Tá an 22ú heagrán de Biodiversity Ireland, ár nuachtlitir dhébhliantúil, foilsithe ag an Ionad Náisiúnta Sonraí Bithéagsúlacta. Is bealach é chun gnéithe d'obair thionscadail an Ionaid Náisiúnta Sonraí Bithéagsúlachta a chur ar taispeáint, chomh maith le haird a tharraingt ar chuid den obair thaifeadta agus shuirbhéireachta a dhéanann príomh-chomhpháirtithe.
Léigh thíos le haghaidh tuairimí ó Liam Lysaght, Stiúrthóir an Ionaid, ar an nuachtlitir.
“Tá an t-earrach faoi lánseol anois, agus an dúlra ag teacht faoi bhláth arís. An t-earrach seo, de réir mar a théann srianta Covid i ndíchuimhne, is mór an sásamh agus an luach a bhaineann le comharthaí na beatha agus na beocht. Ba thréimhse an-deacair iad an dá bhliain anuas, a chuir cuid mhór de na rudaí a ghlac muid go talamh slán leo go dtí seo faoi thástáil. Ceann de na hiarmhairtí a bhain leis na dianghlasálacha ná gur chuir sé iallach orainn go léir moilliú agus dul i dteagmháil níos mó lenár dtimpeallacht. I gcás go leor daoine, chuir sé buntáistí na bithéagsúlachta agus timpeallachta áitiúla folláine go mór i lár an aonaigh. I gcás daoine eile, chabhraigh spéis sa bhithéagsúlacht go cinnte chun déileáil níos fearr leis na dúshláin a bhain le dianghlasálacha Covid. Mar sin féin, in ainneoin thábhacht na bithéagsúlachta, tá Éire i lár éigeandála bithéagsúlachta.
Tá a fhios againn gurb amhlaidh atá an scéal mar gheall ar an méid a léiríonn an fhianaise dúinn faoi mheath speiceas agus faoi laghdú ar cháilíocht na n-éiceachóras. Is iomaí duine aonair agus eagraíocht a ghineann an fhianaise seo, agus iad ag obair chun sonraí a shuirbhéireacht, a chomhordú agus a anailísiú chun tuiscint níos fearr a fháil ar a bhfuil ag tarlú do ghnéithe éagsúla de bhithéagsúlacht na hÉireann.
Tugann eagrán an Earraigh 2022 de Biodiversity Ireland léargas ar chuid den obair thábhachtach atá á déanamh ag an Ionad Sonraí agus ag cuid dá chomhpháirtithe ar an mbithéagsúlacht in Éirinn. Léiríonn sé luach na n-eagraíochtaí neamhrialtasacha caomhnaithe agus na gcarthanachtaí caomhnaithe a bhfuil a leithéid de shaineolas acu i sainréimsí na bithéagsúlachta. Léiríonn sé an rannpháirtíocht ollmhór atá ann cheana féin le líonra mór daoine a thaifeadann bithéagsúlacht agus a fheiceann í mar shaothrú foghlama ar feadh an tsaoil. Leagann sé béim ar thábhacht na suirbhéanna córasacha rialta chun cabhrú le monatóireacht a dhéanamh ar dhaonraí bithéagsúlachta ionas gur féidir aon athruithe atá ag tarlú a bhrath, a chainníochtú agus a thuairisciú chun gníomhaíocht chaomhnaithe a spreagadh. Léiríonn sé freisin an tábhacht a bhaineann le taighde eolaíoch chun tuiscint níos fearr a fháil ar an gcúis a bhfuil cuid de na hathruithe seo ag tarlú agus ar an gcaoi ar féidir na tionchair a mhaolú, rud ar cheart dó cabhrú arís le heolas níos fearr a chur ar bheartas chun gníomhaíocht chaomhnaithe níos spriocdhírithe a ghlacadh.
Tá an Roinn Tithíochta, Rialtais Áitiúil agus Oidhreachta ag an gcéim chomhairliúcháin faoi láthair maidir le hullmhú an 4ú Plean Náisiúnta Gníomhaíochta um Bithéagsúlacht na hÉireann mar chreat do bheartas poiblí agus do ghníomhaíocht chun caomhnú bithéagsúlacht na hÉireann a fheabhsú. Leis an tacaíocht pholaitiúil athnuaite atá faighte ag an mbithéagsúlacht ón Rialtas reatha, tá ionchas comhfhreagrach ann go gcuirfidh an Plean nua seo an spreagadh ar fáil chun an dearcadh i leith chaomhnú na bithéagsúlachta in Éirinn a athrú, ar bhealach réadúil. Tá an tIonad Náisiúnta Sonraí Bithéagsúlacta ag tnúth lena chion féin a dhéanamh chun cuidiú le huaillmhianta an Phlean a bhaint amach.”
