Plean Straitéiseach an Ionaid Náisiúnta Sonraí Bithéagsúlachta 2024-2028

Le breis agus 15 bliana, tá an tIonad Náisiúnta Sonraí Bithéagsúlacta ina phríomhchuid de bhonneagar oidhreachta náisiúnta na hÉireann. Ag tógáil ar an rath a bhí air roimhe seo, cuimsíonn an Plean Straitéiseach cuspóirí chun eolas ar bhithéagsúlacht na hÉireann a fheabhsú, chun cabhrú le gníomhaíochtaí fianaise-bhunaithe níos fearr le haghaidh caomhnú agus athchóiriú na bithéagsúlachta, agus chun úsáid sonraí bithéagsúlachta a chur chun cinn don eolaíocht agus don chinnteoireacht. Beidh sé ina sheirbhís thacaíochta riachtanach na cuspóirí seo a bhaint amach chun cuidiú leis an Stát aghaidh a thabhairt ar an dúshlán a bhaineann le cúlú a chur ar chailliúint na bithéagsúlachta agus ar dhíghrádú éiceachóras.

Cheana féin léirigh an tIonad Náisiúnta Sonraí Bithéagsúlacta a rath maidir le líonra mór suirbhéirí agus taifeadóirí deonacha a chothabháil. Bainistíonn sé líonra oibrithe deonacha a dhéanann monatóireacht ar an mbithéagsúlacht ag níos mó ná 1,700 suíomh, ag soláthar léargais luachmhara ar an gcaoi a bhfuil an bhithéagsúlacht ag athrú. Is cion ollmhór agus luachmhar é seo a dhéanann oibrithe deonacha, agus déanann siad an cion ollmhór seo toisc go dtuigeann siad fiúntas na bithéagsúlachta agus go bhfuil paisean acu faoina caomhnú.

Féadfaidh sé a bheith deacair a bheith rannpháirteach sa bhithéagsúlacht. Mar sin féin, tríd an obair rannpháirtíochta a rinne an tIonad Náisiúnta Sonraí Bithéagsúlacta in 2023 spreag sé níos mó ná 8,000 taifeadóir chun níos mó ná 160,000 breathnú ar an mbithéagsúlacht a chur faoi bhráid an Ionaid Náisiúnta Sonraí Bithéagsúlacta. I dtír bheag cosúil le hÉirinn is leibhéal suntasach gníomhaíochta é seo.

Feidhmíonn an tIonad freisin mar nód na hÉireann don Áis Faisnéise Bithéagsúlachta Domhanda (GBIF), an bunachar sonraí bithéagsúlachta is mó ar domhan, ag cinntiú go bhfuil Éire ceangailte le líonra domhanda comhpháirtithe atá ag obair chun sonraí ar bhithéagsúlacht dhomhanda a chur ar fáil go héasca d'aon duine, áit ar bith ar domhan.

I ndiaidh cinneadh ón Rialtas, bunaíodh an tIonad Náisiúnta Sonraí Bithéagsúlacta, a d'fheidhmigh le blianta fada mar chlár a mhaoinigh an Chomhairle Oidhreachta, mar Chuideachta faoi Theorainn Ráthaíochta i mí na Nollag 2022. Is é John McCarthy, iar-Ard-Rúnaí ar an Roinn Comhshaoil, Pobail agus Rialtais Áitiúil, cathaoirleach Bhord Stiúrthóirí an Ionaid. Cabhróidh struchtúr rialachais soiléir ar leith go mór le fás agus forbairt bhreise an Ionaid Náisiúnta Sonraí Bithéagsúlacta sa todhchaí ionas go mbeidh sé in áit níos fearr chun tacú le hiarrachtaí an Stáit aghaidh a thabhairt ar dhúshlán chailliúint na bithéagsúlachta.

Bhí an-áthas ar an mBord gur sheol Malcolm Noonan, T.D., an tAire Stáit um Nádúr, Oidhreacht agus Athchóiriú Toghcháin ag an Roinn Tithíochta, Rialtais Áitiúil agus Oidhreachta an Plean Straitéiseach Dé hAoine, an 2^ra Feabhra 2024, ag ócáid i gCill Chainnigh.