Tuarascáil Meántéarma um Phailneoirí Talamh Feirme a Chosaint - Ionad Náisiúnta Sonraí Bithéagsúlacta

Ba mhaith linn an deis seo a thapú chun machnamh a dhéanamh ar éachtaí thionscadal EIP um Phailneoirí Talamh Feirme a Chosaint go dtí seo (Iúil 2019 – Lúnasa 2022) agus buíochas a ghabháil le gach duine a ghlac páirt sa tionscadal agus a chuidigh leis. Is féidir leat an tuarascáil a íoslódáil ag: Tuarascáil Meántéarma um Phailneoirí Talamh Feirme a Chosaint.

Cárta scóir pailneoirí don fheirm ar fad

D'úsáid feirmeoirí an cárta scóir pailneoirí don fheirm ar fad chun a bhfeirmeacha féin a scóráil ar feadh dhá bhliain as a chéile. Leanann an córas scórála de bheith ag léiriú an raoin a rabhthas ag súil leis don ghrúpa píolótach de 40 feirm a roghnaíodh chun cineálacha agus déine feirmeoireachta éagsúla a léiriú. Ríomhadh an íocaíocht thorthaí do gach ceann de na 40 feirm agus tá dhá íocaíocht thorthaí faighte ag feirmeoirí. Tá 19 ngníomh ar an gcárta scóir. Faigh tuilleadh eolais faoin gcárta scóir pailneoirí agus conas a oibríonn sé ar leathanach 7 den tuarascáil meántéarma.

Scór pailneoirí na feirme ar fad do gach cineál feirme (mairteoil n=10, déiríocht n=10, measctha n=10 agus curaíocht n=10 do na blianta feirmeoireachta 2019/2020 (buí) agus 2020/2021 (gorm). Léiríonn gach barra scór feirme aonair.

Tá feirmeoirí ag gníomhú chun cabhrú le pailneoirí

Tá feirmeoirí ag gníomhú chun cabhrú le pailneoirí ar a bhfeirmeacha. Tríd is tríd, tá méadú tagtha ar na Pointí Pailneora ar fud na 40 feirm agus laistigh de gach cineál feirme (mairteoil, déiríocht, measctha agus curaíocht). Mhéadaigh fiche a cúig feirm a scóir phailneora idir bliain a haon den íocaíocht thorthaí agus bliain a dó. Mhéadaigh ceithre fheirm a scór faoi níos mó ná a trí.

Céatadán na ngrúpaí pailneoirí a aimsíodh ar na 40 feirm (Bumbóga 21%, Beacha meala 12%, Beacha gabhair 63% agus Beacha aonair 4%).

Pailneoirí a aimsíodh ar an bhfeirm

Bailíodh tacar sonraí ina raibh 8,669 taifead de phailneoirí ó na siúlóidí trasghearrtha, na gaistí panna agus na gaistí malaise. Aithníodh 8,003 de na heiseamail seo go leibhéal an ghéinis agus aithníodh 7,191 eiseamal go leibhéal an speicis. Taifeadadh seacht speiceas is tríocha de bheacha agus 57 speiceas de bheacha gabhair.

Creidiúint Grianghraif: John O' Loughlin

Rannpháirtíocht feirmeoirí

D'úsáid feirmeoirí an cárta scóir pailneoirí don fheirm ar fad chun a bhfeirmeacha féin a scóráil ar feadh dhá bhliain as a chéile. Bhí rannpháirtíocht na bhfeirmeoirí leis an tionscadal an-dearfach. Thug feirmeoirí aiseolas dearfach ar an gcur chuige áitiúil i leith an tionscadail, ar an sásra íocaíochta torthaí, agus ar shimplíocht an chárta scóir. Ba fhoireann iontach iad na feirmeoirí le bheith ag obair leo agus acmhainn luachmhar ó thaobh faisnéis ríthábhachtach a sholáthar maidir leis na cleachtais bhainistíochta atá neamhdhíobhálach don bhithéagsúlacht agus atá indéanta ar an bhfeirm.

Is tionscadal de chuid EIP (Comhpháirtíocht Nuálaíochta Eorpach) é Pailneoirí Talamh Feirme a Chosaint atá á riar ag an Ionad Náisiúnta Sonraí Bithéagsúlacta. Maoinítear an Tionscadal le Maoiniú Ionstraim Téarnaimh an AE faoin gClár Forbartha Tuaithe 2014-2022.

Is tionscadal EIP (Comhpháirtíocht Nuálaíochta Eorpach) é an Tionscadal um Phailneoirí Talamh Feirme a Chosaint atá á riaradh ag an Ionad Náisiúnta Sonraí Bithéagsúlacta. Tá an Tionscadal maoinithe ag Maoiniú Ionstraim Téarnaimh an AE faoin gClár um Fhorbairt Tuaithe 2014-2022.