Atlas Bóíní Dé 2025

Is grúpa tarraingteach feithidí iad na bóíní Dé, a fhaightear i réimse leathan gnáthóg. Is é an bhóín Dé seacht spota an speiceas is cáiliúla go mór, mar is speiceas coitianta agus forleathan é a fhaightear i ngach gairdín. Beidh a fhios ag duine ar bith a bhfuil spéis dá laghad aige sa gharraíodóireacht gur creachadóirí iad an chuid is mó de na bóíní Dé, agus bíonn idir dhaoine fásta agus larbhaí ag cothú ar aifidí agus ar lotnaidí eile a dhéanann dochar do bharra. Ina thaobh sin, meastar gur feithidí tairbhiúla iad agus ceapann daoine áirithe gur comhartha an áidh é ceann a fheiceáil fiú!

Baineann bóíní Dé leis an bhfine feithidí Coccinellidae, a bhfuil 38 speiceas díobh le fáil in Éirinn. Tá cuid acu seo beag agus gan spotaí agus ní mheasfaí gur gnáthbhóíní Dé iad; go ginearálta tagraíonn bóíní Dé do 19 speiceas a taifeadadh in Éirinn. Tá go leor sonraí ann maidir le dáileadh agus stádas na mbóíní Dé i dTuaisceart Éireann, a bhuíochas go mór d'obair Roy Anderson le tacaíocht ón Ionad Sonraí agus Taifeadadh Timpeallachta (CEDaR), Tuaisceart Éireann. Is lú an t-eolas atá ar stádas agus ar dháileadh na mbóíní Dé i bPoblacht na hÉireann.

Chun dul i ngleic leis an mbearna eolais seo, tá an tIonad Náisiúnta Sonraí Bithéagsúlacta ag cur tús le tionscadal Atlas Bóíní Dé 2025. Tá dhá phríomhchuspóir ag tionscadal Atlas Bóíní Dé 2025. Ar an gcéad dul síos, an méid breathnóireachta ar bhóíní Dé a mhéadú chun léarscáileanna dáilte níos cuimsithí a tháirgeadh do gach speiceas bóíní Dé in Éirinn. Agus ar an dara dul síos, feabhas a chur ar an eolas faoi roghanna gnáthóige na speiceas éagsúil bóíní Dé.